07.05.2026 Скопје
Милиони граѓани низ Англија, Шкотска и Велс денес се упатуваат кон гласачките места на најголемиот изборен циклус во Велика Британија од општите избори во 2024 година.
Гласачите во Шкотска и Велс одлучуваат за составот на нивните национални парламенти, додека во Англија има локални избори за околу 5.000 советници во повеќе од 130 локални власти, како и избори за шест градоначалници.
Гласачките места се отворени од 7 до 22 часот по локално време, а првите резултати се очекуваат утре, додека конечниот исход ќе биде познат во текот на викендот.
Во Шкотска се избираат сите 129 членови на парламентот, кои ќе одлучуваат за клучни области како што се здравството и образованието, додека во Велс се избира проширен Сенед со 92 места, кој ја одредува политиката во делегираните овластувања.
Во Англија, изборите ќе влијаат на управувањето со локалните услуги, вклучувајќи ги училиштата, социјалната грижа, комуналните услуги и транспортот, при што поголемиот дел од локалните власти моментално ги држи Лабуристичката партија.
Изборите се исто така значаен тест за политичкото расположение во земјата по победата на Лабуристите на општите избори во 2024 година и се втор голем изборен циклус за време на мандатот на британскиот премиер Кир Стармер.
Сите возрасни граѓани на Велика Британија и Ирска, како и одредени странски државјани со престој, имаат право на глас, додека во Англија е потребна важечка лична карта со фотографија за гласање лично.
Подготвено од А.Ѓ.
About Author
