18.08.2026 Скопје
САД и Канада водат разговори за постигнување договор во последен момент за да се избегне стапување во сила на нови американски царини од 50 проценти вечерва на полноќ.
Тензиите меѓу двете соседни земји би можеле да ескалираат ако не се постигне договор до полноќ вечерва и ако американскиот претседател Доналд Трамп навистина воведе царини од 50% за канадските производи, во вкупна вредност од околу 20 милијарди долари.
Како што се приближува крајниот рок, двете земји бараат некаков вид примирје за да спречат стапување на сила на нови царини.
„Преговараме. Преговорите се многу интензивни и чувствителни. Сега не е време јавно да зборуваме за тоа“, изјави канадскиот премиер Марк Карни пред новинарите во понеделник.
Речиси 72 проценти од извозот на Канада минатата година отиде во Соединетите Американски Држави.
Администрацијата на Трамп би морала да биде претпазлива во врска со воведувањето голема нова царина – која би ја платиле американските увозници, а потоа би им се префрлила на потрошувачите преку повисоки цени – бидејќи во ноември има избори за Конгресот, на половина од мандатот на американскиот претседател.
Американските гласачи се веќе фрустрирани од високите трошоци за живот.
Канаѓаните би сакале олеснување од американските царини за челик и алуминиум, како и за меко дрво, за кое Америка тврди дека добива неправедни владини субвенции.
Трамп ги направи царините централен дел од својата економска агенда за време на неговиот втор мандат. Минатата година, тој воведе двоцифрени царини за увоз од речиси секоја земја во светот.
Врховниот суд во февруари пресуди дека Трамп ги пречекорил своите овластувања, но американскиот претседател веднаш побара други начини да го обнови својот план за нови царински мерки.
Во јули, Трамп воведе тарифи од 10 до 12,5 проценти за 59 земји и Европската Унија – кои заедно сочинуваат 99 проценти од американскиот увоз – поради наводно неспроведување или спроведување ограничувања за увоз на стоки произведени со употреба на (евтина) принудна работа.
Подготвено од А.Ѓ.
About Author
