05.06.2026 Скопје
Поранешната германска канцеларка Ангела Меркел ги отфрли критиките кон владата на канцеларот Фридрих Мерц, велејќи дека е погрешно да се тврди дека нема напредок во работата на извршната власт.
Меркел изјави дека новата влада е на власт нешто повеќе од една година и дека во тој период усвоила буџети, донела одлуки за трошоците за одбрана и инфраструктура и иницирала одредени промени во пензискиот систем.
„Усвои буџети, донесе фундаментални одлуки во врска со трошоците за одбрана и инфраструктурата. Воведе интересни елементи, вклучително и во пензискиот сектор, како што е предвременото пензионирање“, рече таа.
Таа нагласи дека, и покрај критиките, „едноставно е неточно дека ништо не се случило“, додавајќи дека реформите, вклучително и оние во здравствениот систем, веќе се во фаза на сериозна дискусија.
Зборувајќи за бавното темпо на реформите, Меркел предупреди дека не треба да се создаваат нереални очекувања во политичкиот процес, особено во контекст на зголеменото влијание на социјалните мрежи врз јавниот дискурс.
Таа рече дека самата претходно направила грешка да создаде очекувања што не можеле да се исполнат.
„Дури и во мое време, целата политичка дебата стана похаотична, првенствено поради социјалните медиуми. Особено во таква клима, грешка е да се создаваат очекувања што нема да бидат исполнети. Јас самата направив таа грешка“, рече Меркел.
Поранешната канцеларка оцени дека за време на нејзиниот мандат имало проблеми со „брзината“ на спроведување на реформите, особено во областите на одбраната и дигитализацијата, нагласувајќи дека ретроспективно „процесот можел да биде побрз“.
„Гледајќи наназад, не бевме доволно брзи. Бев многу незадоволна од брзината на дигитализацијата. Планиравме многу повеќе, но нивното спроведување е исклучително тешко во рамките на нашите федерални структури“, рече Меркел.
Одговарајќи на критиките на Мерц за зголемувањето на политичкиот притисок и нападите врз социјалните медиуми, Меркел рече дека политичката функција вклучува и „тешки аспекти“.
Во едно интервју, таа истакна дека во својата политичка кариера се угледувала на поранешниот канцелар Хелмут Кол, наведувајќи дека тој верувал дека „никој не мора да прифати политичка функција, туку дека таа носи и одговорност и предизвици“.
Меркел ги отфрли шпекулациите за можно враќање во политиката, како и тврдењата дека би можела да посредува во преговорите меѓу Русија и Украина, наведувајќи дека таквата улога бара политичка моќ што таа во моментов ја нема.
„Зад мене имам вистински исполнет политички живот. Немам сила, мотив или љубопитност за нови позиции. Како што знам од искуство, со рускиот претседател (Владимир Путин) може да се преговара само ако се поседува политичка моќ што е дадена за ограничено време во демократијата“, рече поранешниот канцелар.
Подготвено од А.Ѓ.
About Author
