07.05.2026 Скопје
Хуманитарната организација „Лекари без граници“ (MSF) денес предупреди дека гладот во Газа довел до нагло зголемување на предвремените породувања и смртноста кај новороденчињата, велејќи дека ситуацијата се влошила во последните месеци поради тешка неухранетост кај бремените жени.
Во соопштението, „Лекари без граници“ наведуваат дека помеѓу јуни 2025 и јануари 2026 година, анализирана е состојбата на 201 мајка и новороденче во единиците за интензивна нега во три болници во градот Газа.
Според овие податоци, речиси половина од бремените жени биле неухранети за време на бременоста, додека една четвртина сè уште имале сериозни проблеми со исхраната во моментот на породувањето, објавува Белга.
Како што е посочено, девет од десет бебиња се родени предвреме, додека 84 проценти имале мала родилна тежина.
Стапката на смртност кај предвремено родени бебиња била двојно повисока кај новороденчињата чии мајки биле неухранети.
„Лекари без граници“ истакнуваат дека смртноста кај децата во Газа речиси и да не постоела пред конфликтот, додека случаите на неухранетост кај децата почнале да се појавуваат во јануари 2024 година.
Организацијата ја поврза кризата со израелската блокада, наведувајќи дека израелските сили ја таргетирале цивилната и медицинската инфраструктура и го ограничиле пристапот до основни потреби и хуманитарна помош.
Според Интегрираната класификација за безбедност на храната, помеѓу 16 октомври и 30 ноември 2025 година, околу 75 проценти од населението на Газа се соочило со сериозна несигурност во однос на храната.
Подготвено од А.Ѓ.
About Author
