28.05.2026 Скопје
Израелскиот премиер Бенјамин Нетанјаху денес изјави дека им наредил на Израелските одбранбени сили (ИДФ) да преземат контрола врз 70 проценти од Појасот Газа, во обраќање на хебрејски јазик на конференцијата на Академијата за лидерство „Еин Прат“.
„Во овој момент имаме целосна контрола над 60 проценти од територијата на Појасот Газа… а мојата наредба е да достигнеме… 70 проценти“, рече Нетанјаху.
На прашањето од публиката дека Израел треба да преземе „100 проценти“ од Газа, Нетанјаху одговори дека тоа „оди чекор по чекор“, но не ја исклучи можноста дека тоа би можело да биде крајната цел. „Прво 70 проценти, ќе почнеме со тоа“, рече тој.
Нетанјаху минатата недела призна дека Израел веќе контролира 60 проценти од територијата во Појасот Газа, значително повеќе отколку што требаше да контролира. Мапите објавени од Израел во март покажаа нова ограничена зона надвор од 53 проценти од Газа што Израел ја контролираше по прекинот на огнот постигнат со посредство на САД во октомври.
Ограничената зона, обележана на мапите со портокалова линија, опфаќа околу 11 проценти од територијата на Газа надвор од „жолтата линија“, која го означува делот од Газа окупиран од израелските трупи по прекинот на огнот. Вкупно, овие области опфаќаат речиси две третини од територијата на Газа.
Подготвено од А.Ѓ.
About Author
