06.08.2026 Скопје
Француско-аргентински државјанин, кој бил во Франција на туристичко патување во втората половина на јули, е потврдено дека е заразен со андскиот сој на хантавирус, по што тој и неговото семејство се сместени во изолација во Шпанија, соопшти денес француското Министерство за здравство.
Присуството на сојот од Андите, единствениот познат сој на хантавирус што може да се пренесе од човек на човек, е потврдено од Националниот референтен центар за хантавируси при Институтот Пастер.
Министерството изјави дека пациентот имал благи симптоми, кои оттогаш исчезнале, и дека се преземени сите потребни мерки за реконструкција на неговите движења и идентификување на сите можни контакти.
Група научни експерти, во соработка со Генералниот директорат за здравство и Француската агенција за јавно здравје, се состанаа денес за да утврдат какви мерки треба да се преземат во врска со овој увезен случај, а воспоставена е и координација на ниво на Европската Унија.
Француските власти не го поврзаа овој случај со епидемијата на хантавирус од Андите на бродот MV Hondius, кој исплови од Аргентина во април.
Три лица починаа во таа епидемија, а најмалку 13 беа заразени.
На почетокот на јули, Светската здравствена организација прогласи крај на епидемијата откако последното лице беше ослободено од карантин.
Иако секоја година низ целиот свет се регистрираат десетици илјади случаи на инфекција со хантавирус, станува збор за ретка болест за која не постои ниту вакцина ниту специфична терапија.
Повеќето инфекции се јавуваат преку директен контакт со заразени животни, најчесто глодари. Загриженоста во овој случај е што андскиот сој на хантавирус е единствениот познат сој што може да се пренесе од човек на човек.
Подготвено од А.Ѓ.
About Author
