10.08.2026 Скопје
Претседателот на шпанската енклава Сеута во Северна Африка, Хуан Хесус Вивас, денес изјави дека меѓу 8.000 и 11.000 недокументирани мигранти останале во градот, по масовниот влез на повеќе од 70.000 мигранти на 30 и 31 јули.
Вивас, за време на состанокот со шпанскиот министер за територијална политика Анхел Виктор Торес, рече дека бара од шпанската влада да активира план што ќе ѝ овозможи на Сеута „да се врати во нормала“.
Тој рече дека централната влада треба „итно“ да воспостави нов центар за притвор за странски државјани, за да „можат да бидат затворени, а нивната слобода на движење да биде ограничена сè додека не се заврши процесот на депортација“.
Претседателот на Сеута нагласи дека тоа мора да биде „прашање на државата“ и дека локалната самоуправа ќе „соработува“, а новиот центар ќе стави крај на чувството на несигурност што постои во Сеута, бидејќи „илјадници луѓе, илјадници бездомници талкаат по улиците“.
Министерот за територијална политика, Анхел Виктор Торес, по средбата со Вивас во Сеута, изјави дека шпанската влада ги сослушала барањата на Сеута и дека ќе ги фокусира своите напори на постигнување напредок во идентификувањето на малолетници без придружба и работа на повторно обединување на семејствата за да можат да се вратат во своите земји на потекло.
Торес рече дека ова мора да биде „приоритет“, но додаде дека „тоа не е лесен процес“, бидејќи делумно зависи и од соработката што Мароко е подготвено да ја обезбеди.
Подготвено А.Ѓ.
About Author
