20.07.2026 Скопје
Турција оваа недела ќе биде погодена од топлотен бран, при што температурите во многу градови ќе достигнат и до 45 степени Целзиусови, па затоа на граѓаните им се препорачува да избегнуваат престој на отворено во најжешкиот дел од денот и да се заштитат од директна сончева светлина.
Заедно со екстремната жештина што ја зафати Турција од мај, рекордни температури се забележани и во сите три мориња – Мраморно, Црно и Медитеранско.
Поради глобалното затоплување, зголемувањето на температурата во морињата околу Турција значително се забрза.
Иако Средоземното Море е сè уште најтопло, Црното Море станува море кое најбрзо се затоплува, додека во Мраморното Море, кое се наоѓа помеѓу двата система, неизбежни се мртви зони со недостаток на кислород и еколошко уништување.
Ова затоплување носи со себе многу проблеми – слуз, инвазивни видови, нарушени екосистеми, умирање на морињата и, секако, влијае на рибарската индустрија, која се бори да преживее.
Експертите исто така истакнуваат дека топлата морска вода го зголемува ризикот од ширење на колера, салмонела и други вирусни заболувања.
Се нагласува дека ова не значи дека секое жешко лето ќе избувнува епидемија, туку дека ризикот е директно поврзан со квалитетот на морската вода, инфраструктурата за канализација и третман, системите за следење на водата за пливање, хигиената на храната, консумирањето сурова/недоволно зготвена морска храна и контролата на јавното здравје.
Метеоролозите предупредуваат дека топлотен бран ќе ја погоди целата земја оваа недела. Температурите ќе достигнат 45 степени Целзиусови во егејскиот и медитеранскиот регион, но субјективното чувство ќе биде како да се 50 степени.
Исто така, издадени се предупредувања до граѓаните во Ајдин, Шанлиурфа и Дијарбакир да бидат претпазливи во текот на најжешкиот дел од денот.
Според метеоролошките податоци, денес се очекува температурата да биде 42 степени во повеќето градови во Турција.
Иако се очекува температурата да падне на 37 степени Целзиусови во четврток и петок, се предвидува дека таа сепак ќе остане над сезонските норми.
Експертите предупредуваат дека постарите лица, децата и лицата со хронични заболувања треба да избегнуваат престој на отворено колку што е можно повеќе помеѓу 11 и 16 часот и им советуваат да пијат многу течности и да избегнуваат директно изложување на сончева светлина.
Подготвено од А.Ѓ.
About Author
