03.07.2026 Скопје
Американските здравствени власти се обидуваат да го утврдат изворот на микроскопскиот паразит кој предизвикува долгорочни гастроинтестинални проблеми по порастот на случаите во Соединетите Држави со почетокот на летната сезона.
Американските центри за контрола и превенција на болести (CDC) потврдија 145 случаи на циклоспоријаза во 17 американски држави од средината на јуни, при што сите инфекции се стекнати во САД.
Предизвикувачкиот агенс на болеста е циклоспора, микроскопски паразит кој предизвикува инфекција позната како циклоспоријаза.
Најкарактеристичниот симптом на болеста е водена, често „експлозивна“ дијареја, која може да трае со недели или дури месеци ако не се лекува.
Други симптоми вклучуваат силни грчеви во стомакот, надуеност, гадење, замор и значително губење на тежината.
Според ЦДЦ, сезоната на зголемен ризик од инфекција трае од 1 мај до 31 август, кога повисоките температури традиционално водат до зголемување на бројот на инфекции.
Иако болеста може да се реши сама по себе во некои случаи, честопати е потребна антибиотска терапија.
Од 145 потврдени случаи, 20 пациенти се хоспитализирани.
Досега не се пријавени смртни случаи поврзани со инфекцијата.
Пациентите се на возраст од пет до 86 години, при што просечната возраст на пациентите е 42 години, а жените сочинуваат 61 процент од пријавените случаи.
ЦДЦ, заедно со Администрацијата за храна и лекови на САД (ФДА) и државните здравствени власти, истражува неколку епидемии што опфаќаат повеќе држави, но причината за ширењето на инфекцијата сè уште не е утврдена.
„Во моментов нема докази за епидемија во повеќе држави предизвикана од циклоспора што ги поврзува сите случаи“, се наведува во извештајот на ЦДЦ.
Здравствените власти препорачаа луѓето со симптоми на циклоспоријаза да одат на лекар за тестирање и соодветен третман.
Подготвено од А.Ѓ.
About Author
