13.07.2026 Скопје
Холандската влада планира да воведе данок на шеќер што би можел значително да влијае на цените на безалкохолните пијалоци, овошните сокови, енергетските пијалоци, па дури и на одредени видови пиво со ниска содржина на алкохол.
Како што објавија холандските медиуми, повикувајќи се на писмо од канцеларијата на премиерот Роб Јетен и извори запознаени со планот, новиот данок ќе се применува на производи што содржат повеќе од шест проценти шеќер.
Според проценките, цената на литарско шише Кока-Кола би можела да се зголеми за околу 25 центи, додека некои производи би можеле да поскапат и до едно евро по пакување.
Се очекува дека новата мерка би можела да донесе приближно 900 милиони евра приходи во државниот буџет годишно, а воедно би ги охрабрила граѓаните да избираат поздрави прехранбени производи.
Сепак, експертите предупредуваат дека спроведувањето на данокот може да биде сложено, особено кога станува збор за одредување на категориите производи што би биле опфатени со новиот данок. Меѓу отворените прашања се критериумите за ослободувања, како и методот на пресметување на данокот за различни видови прехранбени производи.
Данокот најмногу ќе ги погоди газираните пијалоци, овошните сокови, енергетските пијалоци, безалкохолните пива и пивата со многу ниска содржина на алкохол.
Слични дилеми се појавија и претходно кога се разгледуваше можноста за намалување на ДДВ-то за овошјето и зеленчукот. Иако таквата мерка би довела до поевтина поздрава храна, данокот на шеќер има за цел да ги направи производите со висока содржина на шеќер поскапи, со што ќе влијае на промена во навиките на потрошувачите.
Холандија со тоа се приклучува на групата европски земји кои се обидуваат да ја намалат потрошувачката на шеќер и да придонесат за подобрување на јавното здравје преку даночна политика.
Подготвено од А.Ѓ.
About Author
