08.07.2026 Скопје
Европската комисија одобри дополнително олеснување на трошоците за електрична енергија за енергетски интензивната индустрија во Германија, дозволувајќи им на компаниите што трошат големи количини електрична енергија да добијат поголема државна поддршка за да ги платат овие трошоци.
Одлуката му овозможува на Берлин да комбинира субвенционирана цена на индустриска електрична енергија со постојните програми за надоместување на трошоците поврзани со Европскиот систем за тргување со емисии на јаглерод (EU ETS), што дополнително ќе ги намали оперативните трошоци на поединечните компании.
Германската министерка за економија Катарина Рајхе оцени дека новите правила ќе придонесат за зајакнување на конкурентноста на домашната индустрија, која долго време се соочува со високи цени на енергијата.
Според проценките на германската влада, проширувањето на програмата за помош би можело да ги зголеми буџетските расходи за околу милијарда евра.
Европската комисија претходно одобри шема за државна помош на Германија во вредност до 3,8 милијарди евра за поддршка на енергетски интензивните индустрии во периодот 2026-2028 година.
Претставниците на индустријата ја поздравија одлуката на Брисел, но предупредија дека трошоците за електрична енергија во Германија се уште се меѓу највисоките во Европа, поради што веруваат дека ќе бидат потребни дополнителни мерки за зачувување на конкурентноста на производствениот сектор.
Подготвено од А.Ѓ.
About Author
