22.06.2026 Скопје
Албанскиот премиер Еди Рама го критикуваше учеството на македонските и косовските граѓани на протестите во Албанија.
Тој во објава на социјалните мрежи рече дека „Албанците од Северна Македонија не можат да се сметаат за дијаспора на Албанија, исто како што Албанците од Косово не можат да се сметаат за такви“.
Рама ги критикуваше организаторите кои, според него, донеле Албанци од Приштина и Тетово на протестите и ги нарече учесниците „жртви на политички каравани“.
„Албанците од Северна Македонија не се дијаспора на Албанија на туѓа територија. Заедно со Македонците, тие се конститутивен народ во сопствената земја. Дијаспората се емигранти кои живеат во странски земји, а не тие, ниту Албанците од Косово, кои имаат своја независна држава“, напиша Рама.
Според Рама, употребата на национални знамиња и албански симболи на протестите со кои се бара соборување на албанската влада го нарушува угледот на Албанците во регионот и на меѓународната сцена.
Тој, исто така, упати обвинувања за финансирањето на овие движења, наведувајќи дека нивните спонзори трошат пари само за да го оцрнат имиџот на Косово и македонските Албанци.
Во својата реакција, Рама се фокусираше и на употребата на знамето на ОВК на протестите, нарекувајќи го „сквернавење“ на симболот на ослободителната војна.
„И никогаш нема да го заборавам сквернавењето на знамето за ослободување на ОВК, кое се крева како знаме на омраза за соборување на владата во Тирана“, рече тој.
На крајот од изјавата, Рама побара неговата изјава да не се толкува како напад врз косовскиот премиер Албин Курти.
Тој нагласи дека не го смета Курти за одговорен за активистите на Ветевендосје кои, според него, биле вклучени во протестот.
„Оставете го Албин Курти настрана од оваа каша“, заклучи премиерот во својата реакција.
Албанија се соочува со континуирани протести повеќе од 20 дена, наречени „Фламинго револуција“, предизвикани од контроверзен проект поврзан со планираната изградба на луксузен туристички комплекс поврзан со зетот на американскиот претседател Доналд Трамп, Џаред Кушнер.
Демонстрации беа организирани и во албанската дијаспора во САД, Велика Британија, Канада, Франција, Германија, Италија, Шведска и Австралија.
Демонстрантите бараат прекин на проектот, укинување на законот за стратешки инвестиции и измени во регулативите за заштитени подрачја, како и оставка на премиерот Рама.
Подготвено од А.Ѓ.
About Author
