17.06.2026 Скопје
Кралството Бутан денес формално ја призна независноста на Хрватска, што ќе ја зајакне соработката меѓу двете земји посветени на стабилност, мир и одржлив развој, соопшти хрватското Министерство за надворешни и европски работи.
„Признавањето е резултат на работата на владата, Министерството за надворешни и европски работи, Постојаната мисија на Хрватска во ОН и Амбасадата во Њу Делхи во согласност со принципите на меѓународното право и целите и принципите на Повелбата на Обединетите нации“, се вели во соопштението на министерството.
Хрватска веќе одржува односи со оваа хималајска нација со околу 800.000 жители во рамките на Обединетите нации, но ова формално признавање е важен поттик за билатерална соработка, во согласност со интересите на двете земји.
Проблемот со Бутан беше големата меѓународна изолација на земјата, која со децении одржуваше дипломатски односи само со неколку десетици други земји, а по распадот на Југославија, бавно ги формализираше односите со државите што произлегоа од неа. Меѓу ретките земји што не ја признаа Хрватска до неодамна беа африканската држава Нигер и полинезиската нација Тонга, но тие го сторија тоа во 2023 и 2024 година.
Хрватска го одбележува денот на меѓународното признавање на 15 јануари, бидејќи на тој датум во 1992 година, таа беше признаена од сите членки на тогашната Европска Унија и други значајни земји во светот.
Подготвено од А.Ѓ.
About Author
