05.06.2026 Скопје
Финската полиција денес соопшти дека четири лица се осомничени во врска со оштетувањето на два подводни телекомуникациски кабли во Балтичкото Море, откако истрагата беше завршена и случајот беше препратен до обвинителството за понатамошно разгледување на евентуални обвиненија.
Според полициското соопштение, истрагата се однесувала на сомневања за сторено кривично дело сериозно оштетување на туѓ имот, обид за сериозно оштетување на туѓ имот и сериозно попречување на телекомуникациите.
Финските власти го запленија товарниот брод „Фитбург“ на 31 декември додека пловел од Русија кон Израел, под сомнение дека е поврзан со оштетување на каблите што ги поврзуваат Хелсинки со Естонија преку Финскиот Залив.
Полицијата соопшти дека тројца од осомничените сè уште се под забрана за патување, во исчекување на одлука од обвинителството дали да поднесе обвинение.
Поради честите прекини на подводните кабли, енергетските и комуникациските врски, регионот на Балтичкото Море е под зголемен безбедносен надзор, а НАТО во меѓувреме го зголеми своето присуство во областа со поморски патроли, авиони и беспилотни летала.
Подготвено од А.Ѓ.
About Author
