27.05.2026 Скопје
Уганда ја затвори границата со соседната Демократска Република Конго во обид да го ограничи ширењето на еболата, соопшти денес владата на земјата.
Границата ќе биде затворена четири недели, освен за тимовите за одговор на ебола, хуманитарните и безбедносните операции, како и за транспортот на храна и товар, изјави на прес-конференција високата здравствена службеничка Дајана Атвајн.
Уганда пријави седум случаи на ебола и еден смртен случај во епидемијата со центар во покраината Итури во Демократска Република Конго.
Според Светската здравствена организација, во Конго се регистрирани повеќе од 900 сомнителни случаи и повеќе од 220 смртни случаи, додека епидемијата на реткиот сој на ебола Бундибугио е прогласена за меѓународна здравствена вонредна состојба.
Владата на Уганда веќе ги објави првите мерки за спречување на прекуграничното ширење на вирусот минатата недела, вклучително и суспендирање на јавниот превоз со Конго.
Атвајн изјави дека секое лице на кое му е дозволено да влезе во Уганда од Конго ќе мора да се самоизолира 21 ден.
Подготвено од А.Ѓ.
About Author
