04.05.2026 Скопје
Главната причина за смртта на најголемиот дел од жртвите во пожарот во дискотеката „Пулс“ е труење со јаглероден моноксид, покажале обдукциските и токсиколошките анализи, презентирани од директорот на Институтот за судска медицина, Александар Станков. Иако кај дел од жртвите биле пронајдени цијаниди, алкохол, дроги или лекови, доминантниот фактор за смртта било задушување предизвикано од јаглероден моноксид, во комбинација со чад, топол воздух и други штетни влијанија. Кај мал број лица, смртта настапила поради тешки изгореници и оштетувања на белите дробови.
Станков објаснил дека јаглеродниот моноксид, како чест гас при пожари во затворен простор, брзо ја исполнува просторијата и го спречува снабдувањето на организмот со кислород, врзувајќи се за хемоглобинот многу посилно од кислородот. Дополнително, чадот, високите температури и присуството на токсични гасови, како водородниот цијанид, го засилуваат неговото дејство.
Анализите покажале различни нивоа на карбокси-хемоглобин кај жртвите, што укажува на изложеност на јаглероден моноксид, како и присуство на цијаниди кај дел од нив, но не во концентрации што би биле главна причина за смрт. Утврдени се и различни количини алкохол во крвта, а кај некои жртви и присуство на дроги и лекови.
Според вештакот, труењето со јаглероден моноксид не треба да се разгледува изолирано, бидејќи при пожари дејствуваат повеќе фактори истовремено – чадот ги блокира дишните патишта, а жешкиот воздух предизвикува изгореници на дишните органи. Во вакви услови, дури и медицинска интервенција често не е доволна, особено кога жртвите веќе биле донесени без знаци на живот.
Пожарот во дискотеката „Пулс“ во Кочани, што се случи во март 2025 година за време на настап, однесе десетици животи и остави стотици повредени, и се смета за една од најтешките трагедии во поновата историја на земјата. Судењето за случајот е во тек.
Подготвено од А.Ѓ.
About Author
