11.05.2026 Скопје
Францускиот носач на авиони „Шарл де Гол“ пристигна во Црвеното Море, во момент кога западните сојузници се обидуваат повторно да го обезбедат Ормутскиот теснец.
Во регионот веќе оперираат два американски суперносачи, УСС „Абрахам Линколн“ и УСС „Џорџ Буш“, додека францускиот брод помина низ Суецкиот канал како дел од пошироко распоредување на Блискиот Исток.
„Шарл де Гол“ е главниот брод на француската морнарица и единствениот француски носач на авиони. Тој е најголемиот воен брод изграден во Франција и најголемиот носач во Западна Европа.
Бродот е во служба од мај 2001 година, има тежина од околу 40.000 тони и е значително помал од американските суперносачи од класата „Нимиц“. Но сепак, се смета за најнапреден носач на авиони надвор од американската морнарица.
„Шарл де Гол“ го придвижуваат два нуклеарни реактори K15 и користи систем за полетување со катапулт и запирање на авионите со сајли при слетување.
Неговото воздушно крило обично брои повеќе од 40 летала, меѓу кои околу 30 повеќенаменски ловци „Дасо Рафал М“ и два авиони „Груман Е-2Ц Хокај“ за рано предупредување и командување.
Франција и Британија, заедно со повеќе од 40 други држави, ја предводат мултинационална мисија чија цел е повторно отворање на Ормутскиот теснец. Париз нагласува дека распоредувањето има одбранбен карактер.
Француското Министерство за одбрана соопшти дека движењето на ударната група на носачот е одвоено од воените операции во регионот и претставува дополнување на безбедносното распоредување.
Точната дестинација на „Шарл де Гол“ сè уште не е позната, ниту колку долго ќе остане на море. Бродот исплови од матичното пристаниште Тулон во јануари, а неговите претходни мисии ретко траеле подолго од четири до пет месеци.
Подготвено од А.Ѓ.
About Author
