04.05.2026 Скопје
Секое излегување од Организацијата на земјите извознички на нафта (ОПЕК) како „негативна или одмаздољубива реакција кон нејзините членови не е конструктивно“, изјави денес портпаролот на иранското Министерство за надворешни работи, Есмаил Багеи, коментирајќи ја одлуката на Обединетите Арапски Емирати (ОАЕ) да ја напуштат групата производител на нафта.
Багеи додаде дека Иран ќе ги задржи своите обврски во рамките на ОПЕК и ги обвини ОАЕ за „несоодветно однесување“ во помагањето на Израел и САД за време на нивната војна против нив.
ОАЕ претходно објавија дека ќе ја напуштат Организацијата на земјите извознички на нафта (ОПЕК) и ОПЕК+ на 1 мај. Како што објави агенцијата WAM во тоа време, „оваа одлука беше водена од националните интереси на ОАЕ и посветеноста на земјата активно да придонесе за задоволување на итните потреби на пазарот, особено со оглед на континуираната геополитичка нестабилност во блиска иднина, што произлегува од нарушувањата во Арапскиот Залив и Ормутскиот Теснец, кои влијаат на динамиката на снабдувањето“.
Американскиот претседател Доналд Трамп ја поздрави одлуката на Обединетите Арапски Емирати да ја напуштат Организацијата на земјите извознички на нафта, оценувајќи дека тоа може да доведе до намалување на цените на нафтата.
Во меѓувреме, Русија објави дека нема намера да го напушти ОПЕК+.
„Ова е формат кој сепак овозможува значително, така да се каже, намалување на ваквите флуктуации на енергетските пазари и овозможува стабилизација на овие пазари“, изјави портпаролот на Кремљ, Дмитриј Песков. Зборувајќи за одлуката на Обединетите Арапски Емирати да го напуштат нафтениот картел, тој рече дека тоа е „суверена одлука“ на ОАЕ и дека Русија „се однесува кон нив со почит“.
ОПЕК е основан во 1960 година, а негови земји-членки се Алжир, Република Конго, Екваторска Гвинеја, Габон, Либија, Нигерија, Ирак, Иран, Кувајт, Саудиска Арабија и Венецуела, а по 2016 година и остриот пад на цените на нафтата, ОПЕК потпиша договори со уште 10 земји производители на нафта: Русија, Азербејџан, Бахреин, Брунеи, Бразил, Казахстан, Малезија, Мексико, Оман, Јужен Судан и Судан, со што се создаде организацијата ОПЕК+.
Земјите-членки на ОПЕК произведуваат повеќе од една третина од светските резерви на нафта. Целта на ОПЕК е да обезбеди стабилизација на пазарот и ефикасно, економично и редовно снабдување со гориво.
Подготвено од А.Ѓ.
About Author
