28.05.2026 Скопје
Европската комисија денес ја казни кинеската платформа „Тему“ со 200 милиони евра за кршење на Европскиот закон за дигитални услуги (DSA), наведувајќи дека компанијата не ја контролирала доволно безбедноста и легалноста на производите што се продаваат преку платформата.
Европската комисија објави дека постои голема веројатност потрошувачите во Европската Унија да наидат на нелегални или небезбедни производи на платформата Temu.
Брисел особено ја критикува компанијата за начинот на кој ги проценува ризиците и ги контролира понудите на производи на платформата.
Според Комисијата, Тему користи општи упатства за е-трговија наместо детална проценка на ризикот специфична за сопствената платформа.
Европските власти, исто така, изјавија дека системот за промоција и маркетинг што го користи Тему дополнително го зголемува ризикот од ширење на нелегални производи.
Истрагата откри сериозни безбедносни проблеми со одредени артикли што се продаваат преку платформата.
Голем број тестирани полначи не ги поминаа основните безбедносни проверки, додека некои детски играчки содржеа хемикалии над дозволените граници или претставуваа ризик од задушување поради мали делови.
Тему има рок до 28 август да презентира план на мерки за корекција на утврдените недостатоци. Доколку Европската комисија го прифати планот, на компанијата ќе ѝ се даде дополнително време да ги спроведе промените, додека во спротивно ќе се соочи со дополнителни казни, според веб-страницата на Европската комисија.
Подготвено од А.Ѓ.
About Author
