30.04.2026 Скопје
Сè почестите обиди за интернет измами фрлаат сенка врз планирањето на летните одмори. Измамниците користат софистицирани методи за да креираат верни копии на легитимни веб-страници на туристички агенции, авио-компании, железнички оператори и популарни платформи за агрегација на патни карти.
Според зборовите на Сергеј Золотухин, експерт за сајбер безбедност, криминалците до жртвите доаѓаат преку спонзорирани резултати од пребарување, таргетирани пораки и агресивни кампањи на социјалните мрежи. Целта на овие лажни страници е јасна – кражба на чувствителни лични податоци и броеви на банкарски картички. Опасноста не демне само при купување билети, туку и при резервација на сместување или организирани излети.
Золотухин ги предупредува граѓаните да бидат исклучително внимателни, особено кога ќе наидат на понуди кои се драстично поевтини од пазарниот просек. Ако нешто изгледа премногу добро за да биде вистинито, големи се шансите дека станува збор за замка, порачуваат експертите.
– Измамниците исто така им нудат на руските туристи кои планираат одмор во Азија и на Блискиот Исток можност да разменат валута по поволни курсеви и да подигнат готовина во земјата на дестинација преку банкомати што исплаќаат пари со помош на QR код. Тие бараат рубљите да се префрлат на руска картичка или телефонски број, но туристите не добиваат ништо за возврат.
За да се заштитат од измамници, Золотухин советува двапати да се проверат веб-страниците за резервации, да се осигури нивната автентичност, па дури потоа да се внесуваат лични податоци. Тој нагласува дека не треба да се префрлаат пари на непознати лица.
Се советува детална проверка на домените на страниците, избегнување сомнителни линкови од реклами и внимателност при секое внесување на податоци од картички, бидејќи во светот на дигиталниот туризам будноста е најсигурен сопатник.
Подготвено од А.Ѓ.
About Author
