02.04.2026 Скопје
Во Русија, за првпат во клиничка пракса е применета персонализирана вакцина против рак, кај пациент – 60-годишен жител од Курската област, соопшти Министерството за здравство на Руската Федерација на 1 април.
„Ова е навистина значаен настан за светската медицинска наука, особено за онкологијата. Оваа напредна технологија наскоро ќе стане достапна за граѓаните на кои им е потребна од медицински причини. Ова не е универзален лек, туку дополнителна алатка во рацете на онколозите“, изјави министерот Михаил Мурашко.
Постапката е извршена во Националниот медицински истражувачки центар за радиологија при Министерството за здравство на Русија. Кај пациент со меланом на кожа е аплицирана антитуморска мРНК (mRNA) вакцина наречена „Неоонковак“. Во моментов, пациентот прима имунотерапија.
„И покрај тековниот третман, постои висок ризик од понатамошно напредување на болеста, а стандардните опции се многу ограничени. Во такви услови, употребата на персонализирана мРНК (mRNA) вакцина се смета како средство за контрола на болеста“, се наведува во соопштението.
Од Министерството посочија дека „Неоонковак“ засега може да се користи како терапија кај возрасни пациенти со неоперабилен или метастатски меланом на кожа.
„Денес сме во точка кога онкологијата станува навистина персонализирана. За првпат користиме мРНК вакцина создадена за конкретен пациент. Ова е суштински поинаков пристап – не само лекување, туку и ‘обука’ на имунолошкиот систем да ги препознае и уништи клетките што претставуваат закана“, изјави Андреј Каприн, генерален директор на Научно-истражувачкиот центар за радиологија при Министерството за здравство на Русија, академик на Руската академија на науките.
Според Мурашко, по првата примена на лекот, клиничката употреба на оваа нова технологија за спасување животи е завршена и, по налог на премиерот Михаил Мишустин, е вклучена во државната програма за гаранции.
Александар Гинцбург, научен директор на Националниот истражувачки центар за епидемиологија и микробиологија „Н. Ф. Гамалеја“, изјави на 3 јануари дека ефикасноста на руската вакцина за лекување на меланом е над 90%.
Подготвено од М.Д.
About Author
