30.04.2026 Скопје
Европската Унија подготвува пакет краткорочни придобивки за Украина со цел да ја приближи до членство, откако државите членки ја одбија можноста за брзо пристапување, изјавија дипломатски извори.
Предложените мерки вклучуваат поголем пристап до пазарот на ЕУ и подлабоко учество во програмите и институциите на блокот.
Украинскиот амбасадор при ЕУ, Всеволод Ченцов, изјави дека Киев и понатаму го гледа полноправното членство како приоритет, но очекува конкретни и брзи чекори кон интеграција.
До иницијативата дошло по состанокот на државите членки во март, на кој биле одбиени предлозите на Европската комисија за забрзано пристапување пред завршување на реформите.
Дипломатите истакнуваат дека е тешко да се очекува членство во краток рок, но дека е потребна „позитивна понуда“ за напредок во меѓувреме.
Меѓу предлозите е модел на „постепена интеграција“, кој би ѝ овозможил на Украина пристап до делови од единствениот пазар, фондови и политички структури пред формалното членство.
Германија и Франција учествуваат во обликувањето на понудата, додека германскиот канцелар Фридрих Мерц оцени дека членството во моментов „не е можно“, но предложи учество на Украина во одредени институции без право на глас.
Се разгледува и доделување статус на „држава во пристапување“, кој би сигнализирал стабилен напредок кон членство, наведуваат изворите.
Украина, сепак, бара поконкретни економски придобивки, вклучително и пристап до единствениот пазар и напредок во спогодби како АЦАА за олеснување на трговијата.
Иако постои политичка поддршка за пристапување, рокот за членство останува неизвесен.
Комесарката за проширување Марта Кос оцени дека целта за влез до 2027 година е „невозможна“.
Украинскиот претседател Володимир Зеленски претходно изрази желба за тој рок.
Службениците наведуваат дека Украина би можела да затвори преговарачки поглавја до крајот на 2027 година со продолжување на реформите, но конечното членство би барало едногласна поддршка од сите земји на ЕУ.
Дипломатите нагласуваат дека предложениот пакет придобивки не може да го замени формалниот процес на пристапување.
Подготвено од А.Ѓ.
About Author
