04.08.2026 Скопје
Јапонија мора да се прилагоди на новите форми на војување, вклучително и употребата на беспилотни летала и вештачка интелигенција (ВИ) во конфликтите во Украина и на Блискиот Исток, како и да ја зајакне сопствената одбранбена индустрија, според годишниот извештај за одбрана на јапонската влада усвоен денес.
Документот од 598 страници, усвоен од владата на премиерот Санае Такаичи, ја идентификува Кина како најголем стратешки предизвик на Јапонија, додека Токио изразува загриженост поради зголеменото присуство на кинески воени бродови во Тихиот Океан.
„Поттикната од искуствата на Украина во употребата на беспилотни летала, Јапонија смета дека е клучно да се прилагоди на новите начини на војување“, се наведува во документот.
Владата во Токио дава приоритет на развојот на сопствени борбени дронови за крајбрежна одбрана, во комбинација со ракети со долг дострел, додека бројни земји низ целиот свет брзо развиваат беспилотни системи.
Јапонската влада проценува дека беспилотните системи би можеле да помогнат во компензацијата за намалениот број на персонал во вооружените сили во земја со опаѓање на населението.
Во извештајот се наведува дека наводното растечко присуство на кинески воени бродови и фреквенцијата на нивните активности во Пацификот се меѓу најголемите безбедносни предизвици за Јапонија.
Министерството за одбрана формираше специјална единица за проучување на јапонската пацифичка стратегија и зајакнување на одбраната против Кина.
Во извештајот, исто така, се оценува дека заедничките воени активности на Кина и Русија во близина на Јапонија, вклучувајќи ги заедничките летови на бомбардери и операциите со воени бродови, претставуваат „сериозна загриженост за националната безбедност“.
Јапонија, исто така, предупреди за развојот на ракетната програма на Северна Кореја, вклучително и хиперсоничното оружје, опишувајќи ја како „сè посериозна и итна закана“.
Зајакнувањето на производството на оружје и технолошкиот развој е клучно за одбранбените способности на Јапонија, се вели во извештајот.
Годишниот извештај за одбраната претставува преглед на воените активности на Јапонија, безбедносните приоритети и проценка на воените трендови во други земји.
Овогодинешното издание вклучува и елементи наменети за пошироката јавност, како што се илустрација во стилот на стрип на корицата и видео содржина на јапонски, англиски и кинески јазик.
Подготвено од А.Ѓ.
About Author
