05.08.2026 Скопје
Топлотниот бран и сушата ја погодија цела Европа, но особено земјите од Централна и Јужна Европа, носејќи пожари, суша и намалено производство на електрична енергија.
Температурите во Австрија денес достигнаа рекордни нивоа, а во Унгарија донесоа суша што влијаеше на намалување на снабдувањето со електрична енергија.
Во австрискиот град Бад Дојч-Алтенбург, во близина на границата со Словачка, температурата достигна рекордни 41,2 степени Целзиусови, соопшти националната метеоролошка служба „ГеоСфер Австрија“, истакнувајќи дека претходниот рекорд од 41 степен Целзиусов беше регистриран во вторник во Виена.
Во соседна Унгарија, компаниите и домаќинствата ја намалија потрошувачката на електрична енергија откако владата апелираше да се намали притисокот врз електроенергетскиот систем поради силната суша и падот на нивото на водата во Дунав, од каде што се црпи вода за ладење на реакторите во нуклеарната централа Пакш.
Температурите во Унгарија денес беа близу 40 степени Целзиусови, а главниот град Будимпешта ќе се соочи со врвот на топлотниот бран во следните два дена.
Рекордно ниските нивоа на водата во Дунав ја принудија Унгарија речиси целосно да ја затвори својата единствена нуклеарна централа „Пакс“, која користи вода од Дунав за ладење на своите реактори, предизвикувајќи енергетска криза и доведувајќи до сериозни проблеми во системот за дистрибуција на електрична енергија. Единствената нуклеарна централа во Словенија, „Кршко“, која исто така снабдува со електрична енергија и соседна Хрватска, денес објави дека ќе почне да ја намалува моќноста на реакторот на 80 проценти преку ноќ поради екстремно високите температури и ниските нивоа на водата во реката Сава, која се влева во Дунав.
Во регионот Малакастер во јужна Албанија, пожарникарите се обидуваа да го локализираат шумскиот пожар што предизвика евакуација на околу 15 семејства, а друг пожар, веројатно предизвикан од удар на гром, се гаснеше на карпест, планински терен јужно од албанскиот град Ѓирокастро.
Пожар во соседна Грција, за кој се верува дека е предизвикан од прегреани електрични кабли и разгорен од силни ветрови, уништи илјадници хектари обработливо земјиште во близина на популарна туристичка дестинација северозападно од Атина.
Во Германија, нивото на водата во Рајна е на минимум, што предизвика речен товарен сообраќај да биде речиси целосно прекинат.
Италија прогласи црвен метеоролошки аларм во сите поголеми градови, бидејќи температурите во некои области достигнаа околу 40 степени Целзиусови. Поради жештината, Ватикан одлучи првата неделна општа аудиенција на папата Лав по јулската пауза да ја одржи во затворен простор, наместо на плоштадот „Свети Петар“.
Подготвено од А.Ѓ.
About Author
