21.08.2026 Скопје
Цените на горивата и мазивата за личен транспорт во Европската унија се зголемија во просек за 16,9 проценти во јули во споредба со истиот месец минатата година, покажуваат податоците на Евростат објавени денес.
Ова е забавување на годишниот раст во споредба со мај, кога цените беа повисоки за 20,7 проценти, но забрзување во споредба со јунските 13,7 проценти.
Горивото беше поскапо во јули отколку една година претходно во 25 од 27-те земји-членки на Европската унија, се наведува во извештајот.
Највисок годишен раст е забележан во Романија од 24,2 проценти, по што следат Германија и Литванија, секоја со 22,9 проценти, Бугарија со 22,2 проценти, Холандија со 22 проценти и Финска со 20,5 проценти.
Цените малку се намалија само во Унгарија, за 0,1 процент, додека најмали зголемувања се забележани во Шведска, за 1,2 проценти, и Ирска, за 3,2 проценти.
Малта ги регулира цените на горивата од 2020 година, така што нема промени во таа земја.
На месечно ниво, цената на дизелот во Европската Унија се зголеми за 4,3 проценти во јули, а на бензинот за 4,7 проценти.
Ова е остар пресврт по падот на цените во јуни, кога дизелот падна за 6,4 проценти, а бензинот за 4,2 проценти во споредба со мај.
Цените на дизелот се зголемија во 17 земји од ЕУ помеѓу јуни и јули, а најголеми зголемувања се регистрирани во Полска (13,4%), Германија (12,7%) и Грција (12,1%).
Во девет земји, цените паднаа на месечна основа, најзабележително во Кипар, 7,9 проценти, Шведска 7,4 проценти и Ирска 6,4 проценти.
Цените на бензинот се зголемија во 14 земји, додека паднаа во 12.
Најголеми месечни зголемувања на цените на бензинот се забележани во Полска, од 17,2 проценти, Германија од 11 проценти и Шпанија од 7,1 процент.
Најголем пад, пак, е забележан во Шведска (11,1%), Кипар (5,4%) и Ирска (4,1%), соопшти Евростат на својата веб-страница.
Подготвено од А.Ѓ.
About Author
