21.07.2026 Скопје
Масивниот напад на украински беспилотни летала врз логистичките центри на компанијата „Вајлдберис“ во московскиот и тамбовскиот регион предизвика остри реакции, а случајот стигна дури и до Обединетите нации.
Портпаролот на Високиот комесар на ОН за човекови права, Тамин Ал-Хитан, на брифинг во Женева изјави дека намерните напади врз цивили и цивилна инфраструктура претставуваат воено злосторство според меѓународното хуманитарно право, нагласувајќи ја потребата од темелна и независна истрага за да се утврдат сите околности на инцидентот.
Според руски извори, на 18 јули украински беспилотни летала ги погодиле логистичките центри на компанијата „Вајлдберис“, една од најголемите платформи за онлајн трговија во Русија.
Нападите резултираа со човечки жртви и материјална штета. Извршната директорка на компанијата, Татјана Ким, објави дека на семејствата на починатите ќе им биде исплатена финансиска помош, додека повредените вработени ќе добијат соодветна отштета и сета потребна поддршка.
Фотографиите и снимките од местото на настанот покажуваат обемна штета на складиштата и пожари што избувнаа по ударот.
Одговарајќи на прашања од новинари во Женева, претставник на Канцеларијата на високиот комесар за човекови права повтори еден од основните принципи на меѓународното хуманитарно право – дека цивилите и цивилната инфраструктура не смеат да бидат цел на вооружени напади.
„Намерните напади врз цивили и цивилна инфраструктура претставуваат воено злосторство според меѓународното хуманитарно право“, рече Ал-Хитан, додавајќи дека е потребно да се утврдат сите факти преку независна истрага.
Подготвено од А.Ѓ.
About Author
