01.07.2026 Скопје
Компаниите што отпуштаа вработени врз основа на тоа дека нивните работни места ќе бидат преземени од вештачка интелигенција (ВИ) почнуваат да ги преиспитуваат таквите одлуки и повторно да вработуваат работници, откако се покажа дека автоматизираните системи не можат целосно да го заменат човечкото искуство.
Меѓу компаниите што го менуваат својот пристап е американскиот производител на автомобили Форд, кој повторно ангажираше стотици искусни инженери за да ги решат проблемите со квалитетот што автоматизираните системи не успеаја да ги решат.
Потпретседателот на „Форд“ за инженерство на хардвер за возила, Чарлс Пун, рече дека вештачката интелигенција е „фантастична алатка“, но дека нејзините резултати зависат од квалитетот на податоците на кои е обучена.
Сличен пресврт направија и Комонвелт Банката на Австралија (CBA) и технолошката компанија IBM.
ЦБА отпушти повеќе од 40 работници за услуги на клиентите минатата година и ги замени со гласовен бот базиран на вештачка интелигенција, но системот не успеа да одговори на потребите на клиентите, што доведе до зголемување на бројот на повици и враќање на претходниот модел на работа.
Синдикатот на австралиските финансиски службеници го поздрави враќањето на тие работни места како „голема победа“, додека банката призна дека не ги зела доволно предвид сите деловни аспекти при донесувањето на одлуката за објавување на отпуштањата.
Слично на тоа, IBM ги замени своите функции за човечки ресурси со вештачка интелигенција која обработуваше околу 94 проценти од рутинските барања, но не беше во можност да ги обработува преостанатите 6 проценти, што покрена етички дилеми. Потоа компанијата објави планови за тројно зголемување на вработувањето практиканти во сите деловни единици во САД до 2026 година.
Директорот за човечки ресурси на IBM, Никл Ламоро, оцени дека без инвестирање во нови генерации вработени, компаниите би можеле да останат без потребниот потенцијал на човечки ресурси за неколку години.
Аналитичарите предупредуваат дека намалувањето на бројот на вработени истовремено со воведувањето на вештачката интелигенција не мора нужно да доведе до раст на бизнисот, особено ако компаниите не инвестираат во обука и развој на вработените.
„Забележливо е дека меѓу компаниите што ја промовираат автоматизацијата, многумина подоцна се покајале за отпуштањата, бидејќи го намалиле бројот на луѓе потребни за надгледување на вештачката интелигенција“, се наведува во извештајот на Intuition Labs.
Според извештајот на софтверската компанија Orgview, 39 проценти од бизнис лидерите отпуштиле вработени поради воведувањето на вештачката интелигенција, но 55 проценти од нив признале дека некои од одлуките за отпуштање биле погрешни.
„Каде што резултатите од вештачката интелигенција се неконзистентни, неточни или тешки за имплементација, компаниите честопати мора повторно да воведат човечки надзор“, рече Џесика Жанг, виш потпретседател за Азија-Пацифик во провајдерот на HR решенија ADP.
Како што наведе таа, ова може да доведе до дуплирање на напорот, побавно донесување одлуки и намалена продуктивност.
Во исто време, анкета што Роберт Халф ја достави до CNBC покажа дека 32 проценти од американските менаџери за вработување отпуштиле работа првенствено поради вештачка интелигенција, а потоа повторно вработиле работник на иста или слична позиција.
Подготвено од А.Ѓ.
About Author
