07.07.2026 Скопје
Јапонската влада претстави ревидирана стратегија за развој на роботиката, според која до 2040 година, земјата треба да има околу 10 милиони роботи распоредени на различни функции, првенствено поради недостигот на работна сила во земјата.
Министерот за економија, трговија и индустрија, Рјосеи Аказава, објави дека стратегијата е проширена на 18 области.
Покрај традиционалната примена на роботите во индустријата, стратегијата за прв пат е проширена на здравствената заштита и производството на храна и пијалоци.
Владата на Токио планира да основа национален центар за развој на роботика базирана на вештачка интелигенција, кој ќе координира истражување, развој, обука на персоналот и поширока примена на роботите во економијата.
Во центарот на стратегијата е Ноетра, јапонски мултимодален модел на вештачка интелигенција дизајниран за контрола на роботи.
Конзорциумот што го развива Noetra е предводен од Softbank, Sony и Honda, додека Fujitsu и Rakuten би можеле да се приклучат на проектот.
Јапонските власти веруваат дека податоците собрани во текот на годините користење роботи во домови за стари лица, производствени погони, спасувачки операции и чистење на нуклеарната централа Фукушима ќе претставуваат клучна конкурентска предност за земјата.
Според министерот Аказава, идната конкуренција во областа на вештачката интелигенција нема да се базира само на компјутерската моќ, туку и на количината и квалитетот на достапните податоци за обука на системите за вештачка интелигенција.
Стратегијата предвидува технологијата развиена преку Noetra да им биде достапна на јапонските компании и истражувачи, за да можат да развиваат роботи за различни индустрии, а подоцна да ги пласираат на странските пазари.
Јапонија, исто така, сака да го поттикне развојот на вештачката интелигенција и роботиката надвор од Токио, така што технолошкиот развој може да се прошири рамномерно во другите делови од земјата.
Главната причина за таков амбициозен план е стареењето на населението на Јапонија и долгогодишниот недостиг на работна сила во земјата, што дополнително се влошува со рестриктивните политики за имиграција.
Јапонските власти проценуваат дека роботите нема да ги заменат постојните вработени, туку ќе ги пополнат работните места за кои нема доволно работници.
Подготвено од А.Ѓ.
About Author
