15.07.2026 Скопје
Земјите-членки на Европската Унија денес се согласија да ја продолжат привремената заштита за луѓето кои избегале од Украина поради војната до 4 март 2028 година, објави Советот на ЕУ.
Одлуката ќе им овозможи на повеќе од четири милиони раселени Украинци да продолжат да уживаат во правото на престој, пристап до пазарот на трудот, здравствена заштита и социјална заштита, како и образование за нивните деца во земјите-членки на ЕУ.
Ирскиот министер за правда, внатрешни работи и миграција, Џим О’Калаган, изјави дека продолжувањето на заштитата обезбедува стабилност за луѓето кои пронашле безбедност во Европската Унија и ја потврдува континуираната поддршка за Украина.
Земјите-членки на ЕУ, исто така, се согласија дека во иднина, привремена заштита ќе им се дава само на нови кандидати кои можат да докажат дека ги исполниле своите воени обврски кон Украина.
Беше наведено дека оваа мерка нема да се однесува на лица кои веќе уживаат статус на привремена заштита во ЕУ. Привремената заштита за украинските бегалци првпат беше воведена во март 2022 година, по почетокот на војната во Украина, и моментално ја користат околу 4,38 милиони луѓе низ Европската Унија.
Се очекува Советот на ЕУ формално да ја усвои одлуката во наредните недели, по што таа ќе стапи на сила по објавувањето во Службениот весник на ЕУ.
Подготвено од А.Ѓ.
About Author
