30.06.2026 Скопје
Преговорите меѓу Куба и САД се во застој и покрај тоа што официјална Хавана неодамна одобри низа реформи кон слободен пазар, изјави денес кубанскиот министер за надворешни работи Бруно Родригез.
Порано овој месец, САД воведоа нови санкции врз кубанскиот претседател Мигел Дијаз-Канел и други кубански функционери, како и врз компании кои се клучни за пропаднатата кубанска економија.
Некои од санкциите беа објавени откако Кубанската комунистичка партија и Националното собрание на народната моќ одобрија 176 економски мерки што претставуваат најголема економска промена од револуцијата.
Реформските мерки делумно се совпаѓаат со некои барања од Соединетите Американски Држави, кои се залагаат за промена на политичкиот и економскиот модел на Куба. Тие овозможуваат повеќе простор за работа на приватните бизниси, слободно вработување на персонал и одобрување за приватни банки и инвестиции од страна на Кубанците во странство.
„Неодамна усвоените реформски мерки се во согласност со целосниот и апсолутен суверенитет. Не сме го слушнале ниту сме заинтересирани мислењето на американската влада за нив. Тие беа пречекани со нов пакет еднострани принудни мерки против Куба“, рече Родригез.
Родригез додаде дека однесувањето на американските претставници е придружено со „постојани агресивни изјави против Куба, закани за воена агресија и наметнување дополнителни принудни мерки“.
„Блокадата и политиката на агресија и непријателство на американската влада кон Куба претставуваат закана за постоењето и благосостојбата на кубанскиот народ, како и за остварувањето на нивните човекови права“, рече Родригез.
Американскиот Стејт департмент не одговори веднаш на барањето за коментар.
Подготвено од А.Ѓ.
About Author
