01.06.2026 Скопје
Годишната инфлација во Бугарија, според прелиминарната „кратка“ проценка, се зголеми во мај од 6,8 проценти во април на седум проценти, па сега е на највисоко ниво од август 2023 година, објави денес Националниот статистички институт (НСИ) на земјата.
Најголем придонес кон зголемувањето на цените дојде од транспортниот сектор, каде што инфлацијата се забрза од претходните 18,5 проценти на 22,1 процент, поради повисоките цени на горивата и трошоците за енергија поврзани со конфликтите на Блискиот Исток.
Цените во Бугарија дополнително се зголемија и во категориите алкохолни пијалоци и тутун, каде што инфлацијата достигна 7,7 проценти, домување, електрична енергија, гас и гориво, со зголемување од 5,2 проценти, како и ресторани и хотели, каде што цените беа повисоки за 9,4 проценти.
Инфлацијата во областа на рекреацијата, спортот и културата остана многу висока и изнесуваше 15,8 проценти, иако малку забави во споредба со април.
Спротивно на тоа, растот на цените на храната и безалкохолните пијалоци се забави на 4,9 проценти, додека цените на облеката и обувките се намалија за 0,4 проценти на годишно ниво.
На месечна основа, потрошувачките цени во Бугарија се зголемија за 0,2 проценти во мај, што е значително забавување во однос на зголемувањето од 1,8 проценти во април.
Според хармонизираниот индекс на потрошувачки цени (HICP), кој Евростат го користи за споредување на инфлацијата меѓу членките на Европската унија, годишната инфлација во Бугарија изнесувала 6,3 проценти, додека цените се зголемиле за 0,3 проценти на месечна основа, според веб-страницата на NSI.
Подготвено од А.Ѓ.
About Author
