20.05.2026 Скопје
Националните загуби на вода во 2025 година изнесуваа 63,05 проценти, што е мало намалување од 0,16 проценти во споредба со претходната година, според податоците од годишниот извештај на Регулаторната комисија за енергетика.
Според извештајот, просечната месечна потрошувачка на вода кај домаќинствата изнесувала 12,59 кубни метри, што претставува намалување од 0,33 кубни метри во споредба со 2024 година. Најниска потрошувачка е регистрирана во Југозападниот регион со 8,67 кубни метри, додека највисока е во Вардарскиот регион со 15,10 кубни метри.
Фактурираната количина на вода во 2025 година достигна 36,95 проценти и остана речиси на исто ниво како и претходната година.
Највисок процент на непријавена вода е регистриран во југозападниот регион – 73 проценти, додека најнизок процент е во југоисточниот регион – 47,88 проценти.
Во извештајот, исто така, се наведува дека покриеноста со водоснабдување е зголемена во сите региони во споредба со 2024 година. Источниот регион има највисока покриеност од 92,58 проценти, а најголем раст од над три проценти е забележан во Југоисточниот регион, каде што покриеноста достигна 87,50 проценти.
РКЕ посочува дека зголемувањето се должи на нови инвестиции и поврзување на помалите рурални системи за водоснабдување со поголемите урбани мрежи.
Во текот на 2025 година, РКЕ донесе 34 одлуки за утврдување тарифи за снабдување со вода за пиење, како и девет конечни регулаторни тарифи во случаи кога општинските совети не ги прифатија предложените ценовни опсези.
Подготвено од А.Ѓ.
About Author
