11.05.2026 Скопје
Полското Министерство за национална одбрана ја разгледува можноста за повторно воведување на задолжителната воена служба, која беше суспендирана во таа земја пред повеќе од една деценија, но не е целосно избришана од правниот систем.
Министерот за национална одбрана Владислав Косињак-Камиш не ја исклучи можноста за такво сценарио, наведувајќи дека постојат законски основи за негово активирање.
„Ова прашање се разгледува. Таква можност е предвидена со одредбите од Законот за одбрана на татковината. Во оваа смисла, секое сценарио е можно“, изјави Косињак-Камиш за полските новинари.
Задолжителната воена служба во Полска беше суспендирана во 2009 година и заменета со доброволен модел, но универзалната воена служба не е формално укината. Полските прописи сè уште оставаат простор државата да ги реактивира задолжителните форми на воена служба доколку е потребно.
Премиерот Доналд Туск претходно објави план за Полска да изгради армија од 500.000 луѓе, вклучувајќи резервни сили, како и широка програма за воена обука за возрасни граѓани.
Според претходните најави на полската влада, целта е од 2027 година годишно да се обучуваат до 100.000 волонтери, со цел да се создадат силни резервни сили покрај професионалната армија и територијалната одбрана.
Полските власти значително ги зголемуваат трошоците за одбрана во последните години, тврдејќи дека безбедносната ситуација во Европа драматично се променила по избувнувањето на војната во Украина и зголемените тензии на источното крило на НАТО.
Подготвено од А.Ѓ.
About Author
