23.04.2026 Скопје
Бројот на милијардери во светот би можел да достигне речиси 4.000 до 2031 година, покажуваат податоците, бидејќи ултрабогатите го зголемуваат своето богатство со сè побрзо темпо.
Во моментов има 3.110 милијардери глобално, според анализа на агенцијата за недвижнини „Најт Френк“. Се очекува оваа бројка да порасне за 25 отсто во следните пет години и да достигне 3.915.
Класата на мултимилионери исто така брзо се шири – бројот на луѓе со богатство од најмалку 30 милиони долари се зголемил од 162.191 во 2021 година на 713.626 денес, што претставува раст од над 300 отсто, покажува анализата на „Најт Френк“.
Раководителот на истражувања во компанијата, Лијам Бејли, изјави дека богатството на милијардерите и милионерите е „суперзасилено“ од профитите во технолошкиот сектор, особено од вештачката интелигенција.
Истражувањето покажува дека бројот на милијардери најбрзо ќе расте во Саудиска Арабија, каде што се очекува да се зголеми од 23 во 2026 година на 65 во 2031 година. Во Полска бројот би се зголемил од 13 на 29, додека во Шведска се прогнозира раст од 81 отсто, од 32 на 58 милијардери.
Ова се случува во време кога јазот меѓу најбогатите и најсиромашните продолжува да се продлабочува. Според извештајот на „Ворлд инекуалити рипорт“, помалку од 60.000 луѓе – односно 0,001 отсто од светската популација – контролираат трипати повеќе богатство од најсиромашната половина од човештвото.
Сè погласни се повиците до светските лидери да ги зголемат даноците за ултрабогатите, поради загриженоста дека најбогатите слоеви купуваат и политичко влијание.
Хуманитарната организација „Оксфем“ утврди дека минатата година е забележан рекорден број нови милијардери, со што вкупниот број првпат надминал 3.000. Според неа, милијардерите колективно располагаат со богатство од 18,3 трилиони долари.
Според листата на „Форбс“, најбогат човек во светот е Илон Маск со нето богатство од 785,5 милијарди долари. На второ место е Лари Пејџ со 272,5 милијарди долари, а на трето Џеф Безос со 259 милијарди долари.
Листата на „Сандеј тајмс“ го рангира семејството Хиндуја како најбогато во Велика Британија, со богатство од 35 милијарди фунти. Гопичанд Хиндуја, милијардерот кој стоеше на чело на семејството со интереси во нафта, банкарство и недвижности, почина минатата година на 85-годишна возраст.
Во 2025 година имало 156 милијардери со седиште во Обединетото Кралство, според истата листа, што претставува најголем пад во нејзината 37-годишна историја, во споредба со 165 една година претходно.
Подготвено од А.Ѓ.
About Author
