29.04.2026 Скопје
Велика Британија се согласи да учествува во создавањето заеднички поморски сили со девет европски земји за одвраќање на идните руски закани од „границата на отворено море“ на север, изјави денес командантот на Кралската морнарица, генерал Сер Гвин Џенкинс.
Џенкинс рече дека, и покрај тековната криза на Блискиот Исток, каде што Ормутскиот теснец останува затворен по американско-израелската војна во Иран, „Русија останува најсериозната закана“ за британската безбедност.
Според него, десетте земји-членки на Здружените експедициски сили (JEF) минатата недела потпишаа декларација за намера за создавање „мултинационални поморски сили“ кои би дејствувале како „дополнување на НАТО“.
Тој сојуз нема да ги вклучува Соединетите Американски Држави, чиј претседател Доналд Трамп постојано ја критикуваше Велика Британија за тоа што не го поддржува активно бомбардирањето на Иран.
JEF ги вклучува Холандија, сите пет нордиски и три балтички држави, при што Велика Британија е нејзин најголем воен член, додека Канада исто така размислува да се придружи.
„Руските упади во нашите води се зголемија за речиси една третина во последните две години“, рече командантот на британската морнарица, додавајќи дека верува оти Велика Британија има „отворена поморска граница со Русија на север“.
Тој рече дека целта на новите поморски сили, кои ќе бидат „командувани по потреба“ од воениот штаб на Обединетото Кралство во Нортвуд, северозападно од Лондон, е да тренираат и да се подготвуваат заедно, но исто така да можат „веднаш да се борат доколку е потребно, со реални капацитети, реални воени планови и реална интеграција“.
Подготвено од А.Ѓ.
About Author
