29.04.2026 Скопје
Претседателот на САД, Доналд Трамп, изјави дека неговиот разговор со рускиот лидер Владимир Путин бил многу добар и изрази увереност дека конфликтот во Украина ќе биде решен и дека може да се заврши пред војната со Иран.
„Мислам дека Путин беше подготвен да склучи договор пред некој ден, мислам дека „некои луѓе“ му го отежнаа постигнувањето договор“, рече Трамп.
Тој рече дека со Путин разговарал за Украина, малку и за Иран, и нагласи дека Украина претрпела воен пораз.
„Допрев неколку различни теми, но најмногу се работеше за Украина“, рече тој.
Тој го спореди украинскиот конфликт со конфликтот со Иран.
„Тие имаа 159 бродови. Сите тие бродови сега се под вода. Сите нивни (воени) авиони се соборени“, додаде Трамп.
Тој наговести дека украинскиот и иранскиот конфликт би можеле да завршат во истиот временски рок.
Трамп рече дека со Путин разговарал за понудата на Москва да учествува во наоѓањето решение за нуклеарната програма на Иран.
„Ми рече дека би сакал да се вклучи во прашањето за збогатување на ураниум во Иран, доколку може да ни помогне во тоа. Му реков дека би сакал тој да се вклучи во завршувањето на војната во Украина“, изјави тој пред новинарите во Овалната соба.
Трамп тврди дека помошта на Русија во решавањето на конфликтот со Иран би била посоодветна откако ќе се реши конфликтот во Украина.
„Владимир Путин и Доналд Трамп имаа телефонски разговор што траеше повеќе од час и половина“, претходно објави помошникот на рускиот претседател Јуриј Ушаков.
Како што истакна тој, разговорот се одвивал во пријателски, деловен тон и бил отворен.
Подготвено од А.Ѓ.
About Author
