08.06.2026 Скопје
Европската комисија ја предупреди Албанија дека контроверзниот туристички проект во заштитеното подрачје Валона-Нарта, поврзан со бизнисменот Џаред Кушнер, зет на американскиот претседател Доналд Трамп, би можел да влијае на нејзиниот напредок на патот кон членство во Европската Унија.
Предупредувањето доаѓа во време кога во Албанија веќе неколку дена траат протестите против изградбата на луксузен туристички комплекс во регионот, кој е познат по својата богата флора и фауна, вклучувајќи фламинга, медитерански мечки и морски желки.
Европската комисија изјави дека Албанија треба да се воздржи од активности што би можеле да го загрозат исполнувањето на барањата од Поглавје 27, кое се однесува на животната средина и климатските промени.
Брисел побара од албанските власти целосно да го усогласат законодавството со европските правила за заштита на природните живеалишта и птиците, како и да ги укинат измените на Законот за заштитени подрачја и да го преиспитаат Законот за стратешки инвестиции.
Според соопштението од Европската комисија, албанскиот министер за заштита на животната средина, Софјан Јаупај, објавил дека работата на проектот е суспендирана и дека ќе се спроведе проценка на влијанието врз животната средина со учество на организациите на граѓанското општество.
Во меѓувреме, Специјалното обвинителство за борба против корупцијата во Албанија отвори истрага за промените во статусот на заштитеното подрачје и сопственоста на земјиштето во врска со проектот.
Протестите, кои организаторите ги нарекоа „Револуција на Фламинго“, добија поддршка и од албанската дијаспора во неколку европски градови и во Соединетите Американски Држави.
Албанија, заедно со Црна Гора, се смета за еден од најсериозните кандидати за членство во Европската Унија од Западен Балкан.
Подготвено од А.Ѓ.
About Author
