11.05.2026 Скопје
Индискиот премиер ги повика граѓаните да штедат гориво колку што е можно повеќе, да се откажат од свадбите во странство и да работат од дома. Овие препораки доаѓаат како директен резултат на енергетската криза предизвикана од војната со Иран, која силно влијае на најнаселената земја во светот.
„Треба да ја ограничиме потрошувачката на бензин и дизел. Во градовите што имаат метро, треба да се одлучиме за таа форма на транспорт. Ако навистина мора да користиме автомобил, тогаш треба да го делиме транспортот со другите“, рече Моди, повикувајќи ги и земјоделците да ја намалат употребата на ѓубрива за половина.
Аналитичарите го опишаа апелот на Моди, упатен на јавен настан во јужниот град Хајдерабад, како „најдрастичен досега“.
„Патриотизмот не е само подготвеност да се жртвува животот на граница. Во вакви времиња, тоа значи да се живее одговорно и да се исполнуваат должностите кон нацијата во секојдневниот живот“, изјави Моди.
Тој додаде дека во сегашната ситуација е клучно да се зачуваат девизните резерви на земјата, поради што апелираше до Индијците да не купуваат златен накит и да избегнуваат патувања надвор од земјата.
Премиерот стави посебен акцент на навиките на средната класа, која сè повеќе организира луксузни прослави и одмори во странство.
„Меѓу средната класа постои растечка култура на одржување свадби и одење на одмори во странство. Треба да ги одложиме ваквите патувања за најмалку една година“, нагласи Моди.
Во последниве години, Индија стана тренд за одржување свадби во странство, а одморалиштата и луксузните хотели во Тајланд се меѓу најпопуларните опции. Владата сега бара од граѓаните „да ги задржат тие пари во земјата за да помогнат во пребродувањето на економскиот шок предизвикан од прекините во снабдувањето со енергија“.
Индија, дом на повеќе од 1,4 милијарди луѓе, е една од земјите најтешко погодени од блокадата на Ормускиот Теснец од Иран. Причината лежи во огромната зависност на земјата од увозот на нафта и гас од Блискиот Исток, кои сега се речиси целосно недостапни или драстично поскапи. Меѓународната агенција за енергија ја опиша ситуацијата како „најголемо нарушување на снабдувањето во историјата“.
Владата претходно користеше вонредни овластувања за пренасочување на горивото од индустриските корисници кон домаќинствата за да обезбеди основни резерви.
Апелот на Моди до граѓаните се смета за обид да се избегне целосен колапс на енергетскиот систем, бидејќи конфликтот во Персискиот Залив продолжува без знаци на смирување.
Подготвено од А.Ѓ.
About Author
