10.03.2026 Скопје
„Војната во Иран предизвика глобална енергетска криза“, рече вчера рускиот претседател Владимир Путин и предупреди дека производството на нафта, кое зависи од транспортот преку Ормутскиот теснец, наскоро би можело целосно да престане.
Путин ја повтори подготвеноста на Русија да ја снабдува Европа со нафта и гас. Русија е втор најголем извозник на нафта во светот и има најголеми резерви на природен гас во светот.
Зборувајќи на состанок со владини претставници и раководители на водечки руски производители на нафта и гас, Путин рече дека Москва е подготвена повторно да соработува, дури и со европски компании и купувачи.
„Доколку одеднаш одлучат да се преориентираат и да ни понудат долгорочна соработка, ослободена од политички притисок, ние сме подготвени да соработуваме со Европејците. Сепак, ни требаат гаранции дека се подготвени и спремни да соработуваат и да обезбедат одржливост и стабилност“, рече Путин.
Тој додаде дека руските компании треба да ја искористат моменталната ситуација на Блискиот Исток, иако забележа дека зголемувањето на цената е веројатно привремено.
Цените на нафтата денес надминаа 100 долари за барел и достигнаа највисоко ниво од 2022 година, бидејќи Ормускиот теснец беше ефикасно затворен поради војната со Иран.
Подготвено од М.Д.
About Author
