09.03.2026 Скопје
Со развојот на автономните автомобили, научниците почнуваат да размислуваат и за промени во основните правила на сообраќајот. Истражувачи од North Carolina State University предложија воведување четврта боја на семафорите – бела светлина, која би помогнала во подобра координација на сообраќајот на раскрсниците.
Идејата е поврзана со фактот дека самоуправувачките возила можат меѓусебно да комуницираат и да разменуваат податоци со сообраќајната инфраструктура. Кога овие возила се поврзани со семафорите и другите автомобили, тие можат да го координираат движењето низ раскрсниците и да го подобрат протокот на сообраќај.
Според предложениот концепт, белата светлина на семафорот би значела дека автономните возила ја преземаат координацијата на движењето, а останатите возачи треба едноставно да го следат возилото пред себе.
Кога на раскрсницата има мал број автономни автомобили, семафорите би продолжиле да функционираат како и досега – со црвено, жолто и зелено светло.
Но, доколку во колоната има поголем број самоуправувачки возила, семафорот би ја активирал белата фаза. Во тој момент, возачите би добиле сигнал да го следат автомобилот пред нив, додека автономните возила меѓусебно ја координираат брзината и редоследот на движење. Во исто време, сообраќајот од попречниот правец би имал црвено светло.
Според резултатите од студијата, дури и мал процент автономни автомобили може значително да го подобри сообраќајот.
Ако само 10 проценти од возилата на патиштата се самоуправувачки, доцнењата во сообраќајот би се намалиле за околу 3 проценти. Ако нивниот удел достигне 30 проценти, застојот би се намалил за повеќе од 10 проценти.
Сепак, воведувањето на новата боја не е едноставно. Само во САД има стотици илјади семафори, кои би требало да се надградат или заменат за да ја поддржат новата технологија.
Затоа експертите предлагаат постепено тестирање на концептот, најпрво во контролирани зони или области каде што има поголема употреба на автономни возила.
Иако засега семафорите остануваат со трите познати бои, идејата за бела светлина покажува како технологијата во иднина може значително да го промени начинот на управување со сообраќајот.
Подготвено од М.Д.
About Author
