24.02.2026 Скопје
Стапуваат на сила новите глобални царини од 10% кои американскиот претседател Доналд Трамп ги донесе по одлуката на Врховниот суд со која беа блокирани голем број од неговите претходни сеопфатни увозни давачки.
Трамп се закани и дека ќе ја зголеми тарифата на 15%, но сè уште не издаде официјална директива за зголемување на стапката. Тој вчера рече дека ќе користи и други закони, па и лиценците, за да ги зголеми царините и да врши притисок на земјите кои извезуваат во САД.
Новата царина од 10%, како што е соопштено, се воведува според Членот 122 од Законот за трговија од 1974 година, кој му дозволува на претседателот да воведува царини 150 дена без одобрение од Конгресот.
Во извршната наредба се наведува дека целта на привремената увозна тарифа е да „реши фундаментални проблеми во меѓународните плаќања и да продолжи со работата на администрацијата за ребалансирање на трговските односи во корист на американските работници, земјоделци и производители“.
Трамп тврдеше дека царините се неопходни за намалување на трговскиот дефицит на САД, односно износот за кој увозот го надминува извозот.
Според најновите официјални бројки, САД веќе собрале најмалку 130 милијарди долари во царини според Законот за меѓународни економски овластувања од 1977 година (IEEPA), кој Врховниот суд сега го оспори.
Подготвено од М.Д.
About Author
