02.02.2026 Скопје
Администрацијата на американскиот претседател Доналд Трамп им соопшти на иранските власти преку повеќе канали дека е отворена за преговори за постигнување договор, а средба меѓу двете делегации би можела да се одржи следната недела во Турција.
„Напредуваме. Правиме сè што можеме (за да се постигнат преговори)“, изјави неименуван висок американски функционер.
Друг неименуван американски функционер изјави дека средба меѓу делегациите на САД и Иран би можела да се одржи следната недела во Турција.
Турција, Египет и Катар, кои беа вклучени во работата за спречување на војна низ целиот регион, сакаат договорот да спречи можна регионална војна.
Службениците од трите земји наводно сакаат специјалниот претставник на САД, Стив Виткоф, и високи ирански функционери, да присуствуваат на потенцијалниот состанок во Анкара.
Службениците на Белата куќа велат дека Трамп не донел конечна одлука за напад врз Иран и е отворен за дипломатско решение.
Американските претставници велат дека изјавите и коментарите на Трамп за Иран не треба да се толкуваат како блеф и дека американската администрација не знае дали врховниот лидер на Иран, ајатолахот Али Хамнеи, ќе им дозволи на неговите претставници да преговараат со американските колеги.
Порано синоќа, Трамп изрази надеж дека Вашингтон може да постигне договор со Техеран и дека не е изненаден од пораките на врховниот лидер на Иран, Али Хамнеи.
Порано во неделата, за време на говорот во Техеран по повод годишнината од враќањето на имамот Хомеини во Иран и почетокот на десетдневната прослава на Фаџр, Хамнеи предупреди дека евентуалната војна меѓу САД и Иран може да ескалира во регионален конфликт.
Во говорот не беше прецизирано дали Хамнеи конкретно се насочил кон некој тековен инцидент, но неговата изјава дојде во време на зголемени тензии меѓу Иран и САД, како и во контекст на регионалните безбедносни предизвици.
Подготвено од М.Д.
About Author
