20.01.2026 Скопје
Оваа година, Русија ќе започне со сериско производство на сателити за широкопојасен интернет и ќе воспостави домашна верзија на американската сателитска мрежа Старлинк, изјави извршниот директор на државната вселенска корпорација Роскосмос, Дмитриј Баканов.
Во блиска иднина, Русија има намера да воспостави две нови констелации на сателити, објаснува руски економски весник. „Зоркиј“ (руски: острогледно) ќе овозможи креирање дигитални мапи во реално време, а „Рассвет“ (руски: зора) на приватната компанија Бјуро1440 ќе биде верзија на мрежата на сателити на Старлинк за обезбедување услуги за широкопојасен интернет, наведува весникот.
Сериското производство на двата типа сателити ќе започне во Русија оваа година, објави Баканов во петокот за Руската прва програма. Сателитот Зоркиј ја снима површината на Земјата од вселената, а дигиталните мапи се создаваат врз основа на овие слики, кои потоа се користат за навигација на беспилотни летала и возила, објасни раководителот на Роскосмос.
Првите три сателити „Зоркиј“ беа лансирани во ниската Земјина орбита во декември минатата година, а според документите на „Роскосмос“, до 2031 година ќе има 99. До 2027 година, констелацијата „Рассвет“ во ниската Земјина орбита ќе има повеќе од 300 сателити, истакна Баканов.
Оваа констелација треба да обезбеди услуги за широкопојасен интернет во тешко достапните територии на Русија, вклучувајќи го и Арктикот, но исто така да овозможи безбедна комуникација за воените сили. „Клучно е да се обезбедат комуникациски услуги во сите области што не се покриени со мрежи на Земјата“, нагласи шефот на „Роскосмос“.
Констелацијата од 300 сателити во ниската Земјина орбита ќе ги покрива само териториите на Русија, а не целиот свет, па затоа целта е реална, објави експертот од ИТ секторот, Герман Клименко. Сателитската мрежа „Рассвет“ ќе го промени системот за команда и контрола во вооружените сили, додека сателитите „Зоркиј“ ќе ја подобрат ефикасноста на високопрецизните напади, изјави воениот експерт Јуриј Кнутов за руски весник.
Во цивилни апликации, „Рассвет“ ќе обезбеди пристап до интернет во оддалечените региони на Русија и ќе ја подобри комуникацијата со бродовите, истакна експертот, додека „Зоркиј“, на пример, ќе го олесни управувањето со земјоделските култури, наводнувањето и противпожарните зони и ќе овозможи развој на автономни возила.
Констелацијата на „Рассвет“ од 300 сателити тешко може да се натпреварува со онаа на „Старлинк“, кое има околу десет илјади вселенски летала, според податоците од ноември минатата година, рече Кнутов.
„Целта на нашиот систем е да ја надминеме британската „УанВеб“, која веќе е воспоставена, но може да обезбедува услуги само за корпоративни клиенти и големи воени единици како што е бригада“, додаде експертот. „УанВеб“ е единствено покрај она на „Старлинк“ кое го покрива целиот свет, има околу 650 сателити во ниската Земјина орбита, а компанијата има намера да го прошири со испраќање уште 440.
Сопственикот на „УанВеб“ , францускиот Еутелсат, нема намера да се натпреварува ниту со Старлинк ниту со Kuiper на Амазон на потрошувачкиот пазар, туку ќе се фокусира на сегментите во кои е конкурентен, изјави извршниот директор Жан-Франсоа Фалашер пред новинарите во август минатата година.
Подготвено од М.Д.
About Author
