24.01.2026 Скопје
Парламентот со 81 глас „за“ и 19 гласови „против“ и воздржани, по скратена постапка, го усвои Предлог-законот за изменување и дополнување на Законот за прекршоците.
Со ова се отвора можност за стартување на системот за автоматско снимање и казнување на сообраќајни прекршоци, наречен „Безбеден град“, од 1 февруари.
На барање на координаторката на „Европски фронт“, Рина Ајдари, гласањето беше поединечно, при што секој пратеник се изјасни за својот глас. За усвојување на Законот беше потребно двотретинско мнозинство.
Предложениот Закон има за цел да ја унапреди безбедноста во сообраќајот преку воспоставување специјализирана постапка за прекршоци регистрирани со помош на технички средства и уреди за снимање.
Се очекува брзото и ефикасно опоменување на прекршителите и изрекувањето казни да придонесе за генерална превенција во доменот на сообраќајната безбедност.
Овој Предлог-закон за изменување и дополнување на Законот за прекршоците предвидува примена на современи технологии (системи за детекција преку технички средства и уреди за снимање), кои можат да послужат како ефикасно средство за брзо откривање на сообраќајни прекршоци и спроведување на процесот на нивно санкционирање.
Во почетната фаза, системот ќе регистрира прекршоци како што се пребрзо возење, минување на црвено светло, истечена важност на сообраќајна дозвола и неправилно паркирање.
Во следниот период е предвидено проширување на опсегот на прекршоци.
Кога системот целосно ќе биде во функција, сопствениците на возила за кои ќе биде утврден прекршок ќе добиваат СМС-порака и електронска пошта со линк за преземање на записникот со платен налог.
Прекршоците ќе можат да се платат електронски, а доколку плаќањето се изврши навреме, нема да се наплаќаат дополнителни трошоци.
За одредени прекршоци кои предвидуваат и забрана за управување со возило, Министерството за внатрешни работи ќе поднесува барање до надлежниот суд за поведување постапка. Во рамките на 76. седница, Парламентот го разгледува и Предлог-законот за изменување и дополнување на Законот за државните награди во прво читање. Парламентот денеска ќе продолжи со две пленарни седници.
Во рамките на 81. седница, на дневен ред остануваат Предлог-законот за изменување и дополнување на Законот за внатрешните работи и Предлог-законот за изменување и дополнување на Законот за полицијата, и двата по скратена постапка.
На дневен ред на 20. седница е Предлог-законот за изменување и дополнување на Законот за посебен регистар за лица осудени со правосилна пресуда за кривични дела сексуална злоупотреба на малолетни лица и педофилија, во прво читање.
Подготвено од М.Д.
About Author
