25.12.2025 Скопје
Верниците на Римокатоличката црква и дел од православните христијани, кои се водат според Грегоријанскиот календар денеска го одбележуваат Раѓањето Христово – Божик.
Папата Лав X во проповедта на Бадник во среда рече дека приказната за раѓањето на Исус во штала бидејќи немало место во гостилницата треба да ги потсети христијаните дека одбивањето да им се помогне на сиромашните и странците денес е еднакво на отфрлање на самиот Бог.
Папата Лео, кој грижата за имигрантите и сиромашните ја направи главна тема на почетокот на своето папство, рече дека раѓањето на Исус го покажува Божјото присуство во секоја личност.
„Нема место за Бог на земјата ако нема место за човечката личност. Да се отфрли едното е да се отфрли другото“, рече Папата за време на свечената служба на која присуствуваа околу 6.000 луѓе во базиликата. Папата го прослави Божиќ за 1,4 милијарди католици во светот со миса во базиликата „Свети Петар“.
Лео, првиот папа роден во Соединетите Американски Држави, го слави својот прв Божиќ откако беше избран од светските кардинали во мај за да го наследи покојниот папа Франциск. Папата, кој ги критикуваше контроверзните политики за имиграција на американскиот претседател Доналд Трамп, цитираше стих од покојниот папа Бенедикт XVI во кој се жали дека на светот не му е грижа за децата, сиромашните или странците.
„Додека искривената економија нè води да се однесуваме кон човечките суштества како кон обична стока, Бог станува како нас, откривајќи го бесконечното достоинство на секоја личност“, рече Лео.
„Каде што има место за човечката личност, има место и за Бога“, рече тој. „Дури и шталата може да стане посвета од храм“.
Надвор од базиликата, околу 5.000 луѓе ја гледаа службата на екрани од плоштадот „Свети Петар“, држејќи чадори на обилниот дожд во Рим, а папата Лав излезе да ги поздрави пред почетокот на мисата.
„Ве восхитувам и ве почитувам и ви благодарам за вашата храброст и желба да бидете тука вечерва“, рече тој, „дури и по вакво време“.
Во четврток, Папата ќе ја одржи Божиќната миса и ќе упати божиќна порака и благослов „Urbi et Orbi“ (до градот и светот).
Традиционално, во државава централната прослава по повод празникот се одржа во Католичката црква „Пресвето Срце Исусово“ во Скопје, каде синоќа имаше божикна полноќна света литургија.
По повод празникот Рождество Христово, Скопскиот бискуп и Струмичко – скопски епарх монсињор д-р Киро Стојанов упати божикна честитка до верниците од католичка вероисповед.
И Словото стана тело и се всели меѓу нас, полно со благодат и вистина; и ние ја видовме Неговата слава, слава како на Единороден од Отецот“ (Иван 1,14). Божјото Слово доаѓа меѓу нас во облик на човек, како дете родено од жена. „Дојде кај Своите, но Своите не Го примија. А на сите што Го примија – на сите што веруваа во Неговото име – им даде моќ да станат чеда Божји“ (Иван 1,11-12).
Синот Божји лежи во јасли, неразделно вистински Бог и вистински човек во единство на Неговата божествена Личност. Ова е нашата вера. Без оваа вера, Божик не би бил ништо повеќе од она што потрошувачкиот менталитет сака да ни го подметне, сезонски празник, како што некои сакаат да ни го наметнат својот израз на неверие.
Зошто Синот Божји доаѓа кај нас да живее меѓу нас како сиромашно и беспомошно дете? Тој доаѓа кај нас со празни раце, но ни се дава Себеси, највисокото и најважното нешто што можел да ни го даде. Во него е вклучено сè што ни треба. Бидејќи во него Бог живее во сета своја полнота. Кога го примаме, имаме сè што ни треба и го имаме во изобилство. Зашто тој е светлината што ја растерува темнината во светот. Тој е нашиот мир. Тој е вистината што нè ослободува. Тој е лебот на животот. Кој јаде од овој леб, кој во својот живот го прима Христос, вечното Слово на Отецот, тој прима живот. Тој самиот ќе каже за себе, кога ќе порасне и ќе го даде својот живот како откуп за мнозина, дека тој е воскресението и животот. Едноставно кажано, тој е повеќе од целата среќа на светот. Зашто тој е Љубов, која сама нè прави благословени и ни дава живот. Сè што копнееме ни е дадено во ова дете. На сите им посакувам среќен Божик и благословена Нова година! Христос се роди!, се наведува во честитката од Стојанов.
Божик денеска слават и Грчката, Бугарската, Романската, Украинската и Грузиската православна црква, кои го прифатија Грегоријанскиот календар. Преостанатиот православен свет кој се води според Јулијанскиот календар, меѓу кои и Руската, Српската и Македонската православна црква, Ерусалимската патријаршија, како и монасите на Света Гора, Божик ќе го одбележат на 7 јануари.
Подготвено од М.Д.
About Author
