29.11.2025 Скопје
Еврокомесарот за проширување, Марта Кос, вели дека РС Македонија мора да направи уставни измени за да го направи следниот чекор кон ЕУ.
„Знаете, веќе имаме отворени преговори за пристапување. Како што споменав, Црна Гора и Албанија, Србија. Чекаме, знаете, да започнеме со РС Македонија и Босна, а Косово, секако, е на крајот. Но, секако, од друга страна, на исток ги имаме Украина и Молдавија, кои постигнаа навистина голем напредок и неодамна направија многу, многу реформи. Значи, има четири земји за кои гледаме навистина добри можности да станат нови членки, под услов, секако, да ги спроведат потребните реформи“, рече комесарката за проширување на ЕУ, Марта Кос, во врска со европскиот пат на земјите од Западен Балкан.
Во интервју, запрашана за аспирациите на РС Македонија и дали сè зависи од спроведувањето на уставните измени, Кос изјави дека кога се зборува за процесот на пристапување на земјата, постојат две важни точки.
„Првото е дека земјата веќе спроведува некои реформи што се неопходни откако ќе го започнеме процесот на пристапување. Но, официјалниот процес, почетната фаза, сè уште не е завршен, бидејќи, како што рековте, тие треба да го променат Уставот. Откако ќе го променат Уставот, без понатамошни одложувања или дополнителни услови, ќе можеме да организираме она што го нарекуваме Меѓувладина конференција. Затоа, со нетрпение ги очекуваме овие важни чекори.“
Од друга страна, како што знаете, РС Македонија е дел од Планот за раст на Западен Балкан и има некои позитивни точки. На пример, од октомври, РС Македонија е дел од механизмот SEPA, се сретнав со премиерот Мицкоски во Тирана минатата недела. Луѓето и компаниите во РС Македонија заштедуваат 62 милиони евра затоа што се дел од SEPA.
„Друг позитивен елемент е тоа што, знаете, имаше договор меѓу РС Македонија и Бугарија за Коридорот 8, кој ќе ни овозможи навистина да го поврземе Јадранското Море со Црното Море. А оваа транспортна врска е многу важна во поширока смисла. Значи, има некои движења, но ако зборувам за процесот на пристапување, да, РС Македонија треба да го промени својот Устав“, објасни еврокомесарот.
Подготвено од М.Д.
About Author
