31.10.2025 Скопје
Кинескиот претседател Ши Џинпинг е во центарот на вниманието на годишниот самит на лидерите од пацифичкиот појас во Јужна Кореја денеска, каде ќе разговара со своите колеги од Канада, Јапонија и Тајланд, откако постигна кревко трговско примирје со американскиот претседател Доналд Трамп.
Договорот – постигнат непосредно пред Трамп да ја напушти Јужна Кореја, прескокнувајќи го големиот дводневен самит на Азиско-пацифичката економска соработка (АПЕК) – ќе ги запре понатамошните ограничувања за кинескиот извоз на ретки метали кои се закануваа да ги заглават глобалните синџири на снабдување.
Поддршката на синџирите на снабдување е значаен фокус на овогодинешниот самит на АПЕК, чиј домаќин е историскиот јужнокорејски град Гјонгџу. Овој економски клуб со 21 членка има за цел да ја поттикне соработката и да ги намали трговските и инвестициските бариери, иако одлуките донесени на состаноците не се обврзувачки, а постигнувањето консензус е сè потешко.
„Додка поредокот за слободна трговија претрпува драматични промени, глобалната економска неизвесност се продлабочува, а трговијата и инвестициите го губат замавот“, им рече јужнокорејскиот претседател Ли Џе Мјунг на собраните лидери на отворањето на сесијата.
Министерот за финансии на САД, Скот Бесент, го замени отсутниот Трамп.
„Промените невидени во еден век се забрзуваат низ целиот свет“, им рече Ши на собраните лидери во говорот во кој повика на заштита на мултилатералниот трговски систем и подлабока економска соработка.
„Колку е морето побурно, толку повеќе мора да се обединиме“, рече Ши.
Додека претседаваше со самитот, Ли рече дека Азиско-пацифичкиот регион се наоѓа во критичен момент во брзо менувачкиот глобален економски поредок.
„Јасно е дека не можеме секогаш да бидеме на иста страна, но мора да работиме заедно за да постигнеме заеднички просперитет“, рече Ли. Тој додаде дека соработката меѓу членовите на АПЕК е „јасно решение“ за моменталните економски предизвици.
Регионот на АПЕК има удел од 50 отсто од глобалната трговија и 61 насто од бруто домашниот производ.
Подготвено од М.Д.
About Author
