08.10.2025 Скопје
Катар објави дека сите страни вклучени во напорите за ставање крај на конфликтот во Газа се согласиле со предложениот план на американскиот претседател Доналд Трамп, но остануваат значајни предизвици во неговата реализација.
„Многу аспекти од планот на претседателот Трамп сè уште треба да се разјаснат“, изјави портпаролот на Министерството за надворешни работи, Маџед ал-Ансари, на прес-конференција во Доха.
Сегашните потешкотии лежат во пренесувањето на спогодбата во конкретни чекори на терен, рече тој. Ал-Ансари рече дека преговорите за планот продолжиле денеска во Шарм ел-Шеик, Египет, при што сите страни се залагаат за напредок. Тој истакна дека разговорите вчера траеле околу четири часа и биле „детални и интензивни“, со цел да се идентификуваат „пречките“ за имплементација.
Тој подвлече дека Катар е посветен на унапредување на планот на американскиот претседател, ставање крај на војната во Газа, завршување на израелската окупација и обезбедување на испорака на хуманитарна помош. Доха, исто така, ја цени „посветеноста на Вашингтон за прекинување на војната“, додаде тој.
Портпаролот рече дека Катар и САД работат заедно за да се осигураат дека спроведувањето на планот на Трамп нема да биде привремено, нагласувајќи ја потребата од „практична и брзо имплементирана рамка“ прифатена од сите страни. Предавањето на заложниците ќе го означи формалниот крај на војната, бидејќи позицијата на САД директно го поврзува прекинот на огнот со ослободувањето на заложниците, рече тој. „Важно сега е да се започне со спроведување на прекинот на огнот и да се запре воената машина што ги меле телата на децата од Газа“, рече тој.
Тој, исто така, истакна дека канцеларијата на Хамас во Доха е дел од медијацискиот механизам на Катар од 2006 година, нагласувајќи дека „иднината на палестинскиот народ мора да биде само во рацете на Палестинците“.
Катар, заедно со САД и Египет, продолжува да посредува меѓу Хамас и Израел во обид да се постигне траен прекин на огнот и да се спречи понатамошна ескалација.
Подготвено од М.Д.
About Author
