08.10.2025 Скопје
Возраста за пензионирање во Германија ќе мора да се зголеми од сегашните 67 на 70 години, изјави лидерот на парламентарната група на ЦДУ/ЦСУ, Јенс Шпан.
Во гостувањето во емисијата „Мајсбергер“ на јавниот радиодифузен серви, Шпан рече дека сегашната возраст за пензионирање од 67 години ќе биде целосно имплементирана до 2030/31 година, но дека нема да застане тука, бидејќи, како што изјави, со подолгиот животен век на населението, мора да се продолжи и работниот век.
„Ако сакаме да го задржиме обемот на социјалните бенефиции без да им ставиме преголем товар на идните генерации, ќе мора да работиме подолго“, додаде тој.
Шпан истакна дека возраста за пензионирање постепено ќе се зголемува во текот на 2030-тите, прво година по година, а потоа месец по месец.
Тој рече дека сега не е вистинско време за политичка дебата за конкретни промени, но нагласи дека јавноста „мора да ја чуе вистината за одржливоста на системот“.
Изјавата на Шпан доаѓа веднаш откако советот на економски експерти, формиран од министерката за економија Катарина Рајхе (CDU), предложи поврзување на возраста за пензионирање со очекуваниот животен век, укинување на пензионирањето на 63 години и повторно воведување на таканаречениот фактор на одржливост во пензискиот систем.
Во Германија, возраста за пензионирање постепено се зголемува од 65 на 67 години од 2012 година и целосно ќе биде достигната во 2031 година.
Предвремено пензионирање е можно со намалени бенефиции, додека посебни услови важат за долгорочно осигурените лица и лицата со попреченост.
Подготвено од М.Д.
About Author
