17.07.2025 Скопје
Германската влада објави дека нема да го поддржи предлогот на Европската комисија за зголемување на долгорочниот буџет на ЕУ на вкупна сума од два трилиони евра (2,3 трилиони долари) за периодот од 2028 до 2034 година.
“Сеопфатно зголемување на буџетот на ЕУ е неприфатливо во време кога земјите-членки вложуваат значителни напори за стабилизирање на нивните буџети,” изјави портпаролот на германската влада, Штефан Корнелиус.
“Затоа нема да можеме да го прифатиме предлогот на Комисијата,” рече Корнелиус.
Претседателката на Европската комисија, Урсула фон дер Лајен, нагласи дека предложениот буџет “ги решава предизвиците на Европа” и “ја зајакнува нашата независност.”
Предложениот буџет на Комисијата е за околу 700 милијарди евра повеќе од износот определен за тековниот седумгодишен период од 2021 до 2027 година. Буџетот на ЕУ, познат како повеќегодишна финансиска рамка, ги утврдува приоритетите на политиката на Европската унија за идните години и ги распределува финансиите на различни сектори.
Најголемиот дел од долгорочниот буџет на ЕУ се финансира преку придонеси од земјите-членки, каде секоја држава плаќа одреден процент од својот бруто национален доход. Како држава со најсилна економија во ЕУ, Германија обично обезбедува нешто помалку од една четвртина од вкупните средства.
Сепак, зголемувањето на предложениот буџет би можело делумно да се финансира преку нови извори на дополнителни приходи, при што Комисијата има за цел да собере дополнителни 58,5 милијарди евра годишно. Комисијата планира да го реформира буџетот од трилиони евра со посилен акцент на трошоците поврзани со одбраната и конкурентноста, воведување нови извори на приходи и промена на критериумите за финансирање.
Конкретно, извршниот орган на ЕУ предлага данок на големи компании со годишен промет над 100 милиони евра и данок на електронскиот отпад што не се собира за рециклирање, како и дел од приходите од националните даноци на тутун да се насочат во Брисел.
Корнелиус изјави дека ниту ова не е поддржано од германската влада, иако го поздрави обидот на Комисијата за реформи и пренасочување на буџетот кон нови приоритети.
Предлогот треба да биде разгледан и изменет во Европскиот парламент и во земјите-членки на ЕУ. Се очекува преговорите да бидат долги и предизвикувачки.
Подготвено од М.Д.
About Author
